आकाशे पुल प्रयोग नगर्ने सर्वसाधारणमाथि कारवाही तिब्र पारेको छ । अभियानका क्रममा कतिले त ट्राफिक प्रहरीको ‘जागिर खाइदिने’ धम्की समेत दिने गरेका छन् ।

मंगलबार भोटाहिटीमा आकाशे पुल प्रयोग नगरी सडक काटेपछि ट्राफिक प्रहरीले नियन्त्रणमा लिएका एक युवकले जागिर खाइदिने धम्की दिएका हुन् । प्रहरीले नियन्त्रणमा लिएपछि निकै आक्रोसित भएका उनले ‘भरे पख्लास्’ भन्दै धम्याएका हुन् । त्यसपछि छेउमा रहेका स्थानीयबासीले उल्टै उनलाई नै हप्काएका थिए ।

प्रहरीले उनको नाम सार्वजनिक गर्न चाहेन भने हाम्रो क्यामारा देख्नासाथ उनले आफ्नो अनुहार लुकाए । उनलाई झण्डै २ घण्टा नियन्त्रणमा राखेर छाडिएको छ । प्रहरी इनिस्पेक्टर सिताराम हाछेथुले भन्नुभयो-’उनलाई स्थानीयबासीले समेत हातपात गर्न खोजेका थिए, हामीले सम्झायौ र २ घण्टा राखेर छाडिका छौं ।’

ट्राफिक प्रहरीहरुका अनुसार अभियानका क्रममा कतिले साथ लिने गरेका छन् भने केहीले दुव्यवहार समेत गर्ने गरेका छन् । हवल्दार गणेश श्रेष्ठले अनलाइनखबरसँग भन्नुभयो-’केहीले राम्रोसँग सहयोग गर्नुहुन्छ । केहीसँग त सामान्य विवाद नै गर्नुपर्छ ।’

मंगलबारमात्र ट्राफिक प्रहरीले आकाशे पुल प्रयोग नगर्ने ६६ जनालाई कारवाही गरेको छ । प्रहरीले आकाशे पुल प्रयोग नगर्नेलाई पहिलो पटक ५० रुपैयाँ जरिवाना गर्ने गरेको छ भने बृद्धबृद्धालाई सम्झाइबुझाइ पठाउने गरेको छ ।

भिडियोसहित

By: Onlinekhabar